የጀርመን መንግስት ለከፍተኛ ትምህርትና ስልጠና ተቋማት የኮቪድ 19 መከላከል የሚውሉ ድጋፎችን አደረገ፡፡

Federal TVET Institute

May 13, 2020

የሳይንስና ከፍተኛ ትምህርት ሚኒስትር ፕሮፌሰር ሂሩት ወ/ማርያም ለከፍተኛ ትምህርትና ስልጠና ተቋማት የኮቪድ 19 መከላከል የሚውሉ ድጋፎችን ከጀርመን አምባሳደር ብሪታ ቫግነር ዛሬ ተረክበዋል፡፡

በስነስርዓቱ ላይ ፕሮፌሰር ሂሩት እንዳሉት የጀርመን መንግስት ለረጅም ዓመታት የኢትዮጵያን ቴክኒክና ሙያ ትምህርትና ስልጠና እና ከፍተኛ ትምህርት ዘርፉን ሲደግፍ መቆየቱን ጠቅሰው በአሁኑ ግዜም ተቋማቱ የኮቪድ 19 ወረርሽን ለመከላከል የሚያደርጉትን ጥረት ለማገዝ የሚያስችሉ ኢንፍራሬድ ቴርሞሜትሮችን፣ የእጅ መታጠቢያ ሳሙናዎችን የዋይፋይ ዶንግል እና በእግር ውሃ በማፍሰስ እጅ መታጠብ የሚቻልበት ማሽን ድጋፍ ማድረጋቸውን ገልጸዋል፡፡ ይሄንንም ለከፍተኛ ትምህርትና ስልጠና ተቋማት በማከፋፈል የኮሮና ቫይረስን ለመከላከል የሚሰሩትን ስራ እንዲያግዝና በተለይ ሰራተኞች ከቤት ሆነው እንዲሰሩ እንደሚረዳ ጠቁመዋል፡፡

አምባሳደር ብሪታ በበኩላቸው መንግስታቸው ከኢትዮጵያ ጋር ከ50 ዓመታት በላይ የዘለቀ የትብብር ስምምነት እንዳለው እና በቴክኒክና ሙያ ትምህርትና ስልጠና ዘርፍ ድጋፍ በማድረግ የ25 ዓመታት የትብብር ድጋፍ ግንኙነት እንዳላቸው ጠቁመው በአሁኑ ግዜም የጀርመን መንግስት ከኮቪድ 19 ጋር ተያይዞ የኢትዮጵያን ኢኮኖሚ፣ ትምህርት፣ ጤና እና የጨርቃጨርቅ ዘርፍ ሰራተኞችን ለመደገፍ የሚያስችል የ120 ሚሊየን ዩሮ ማዘጋጀቱንም ገልጸዋል፡፡
አሁንም በጀርመኑ ጂአይዜድ በኩል የቴክኖሎጂ ሽግግር ፕሮጀክት በመንደፍ ኮተቤ በሚገኘው የቴክኒክና ሙያ ትምህርትና ስልጠና ኢንስቲትዩት የተመረቱ በእግር በመረገጥ ውሃ የሚያፈስሱና እጅን ለመታጠብ የሚስችሉ ማሽኖችን ድጋፍ አድርጎ 600 ያህል በማስመረት ለሁሉም ከፍተኛ ትምህርትና ቴክኒክና ሙያ ትምህርትና ስልጠና ተቋማትና ቢሮዎች በማዳረስ ቴክኖሎጂውን አባዝተው ለአከባቢያቸው ማህበረሰብ ጥቅም እንዲያውሉ ለማድረግ እየሰሩ መሆናቸውን ገልጸዋል፡፡

በተጨማሪም ከኮቪድ 19 ወረርሽኝ ጋር ተያይዞ ሰራተኞች ቤት ሆነው እንዲሰሩ ለማስቻል የሚያግዙ 75 የኢንተርኔት ዋይፋይ ዶንግሎችና በእነዚህ ተቋማት የሚከፋፈሉ 200 ሺህ የእጅ መታጠቢያ ሳሙናዎችን እንዲሁም 50 የሙቀት መለኪያ መሳሪያዎችን ድጋፍ ማድረጋቸውን ገልጸው ወደፊት ኮቪድ 19 ቢያልፍም ይሄንኑ ድጋፍ አጠናክረው እንደሚቀጥሉ ቃል ገብተዋል፡፡

ፕሮፌሰር ሂሩት ለተደረገው ድጋፍ አመስግነው በተለይ ቴርሞሜትሮቹ የለይቶ ማቆያና ማገገሚያ ማዕከላት በመሆን ለሚያገለግሉ ዩኒቨርስቲዎች ጠቃሚዎች ናቸው ብለዋል፡፡

ሚኒስትሯ ባስተላለፉት መልዕክትም ተማሪዎች ሳይዘናጉ ከትምህርታው ጋር ተያያዥ የሆኑ ንባቦችን እንዲያደርጉና ራሳቸውን ከቫይረሱ በመከላከል ሌሎች ወገኖቻቸውም እንዲጠነቀቁ እንዲያስተምሩ አደራ ብለዋል፡፡
(MoSHE)

 


Don't forget to visit our Facebook page for other News and Updates!
https://www.facebook.com/tveti